2007-09-30 元朗大棠行

星期日, 好充實

一早約左幾個朋友今日去元朗大棠行山, 5個家庭共有8人11狗(9隻Jack Russell, 其餘兩隻係斑點狗同牧羊犬, 好開心~

行左咁多年山, 第一次濕水, 我帶我3隻小狗行溪流, 我地4個都濕落晒水, 好彩只係腳濕晒, 不過大家都好開心, d 水仲好清涼~

行左3個鍾, 去路口士多食埋個早餐, 之後番屋企同佢地沖涼, 整好埋自己就去其中一對朋友家食大餐, 頭盆係自家製田螺局薯蓉, 第二道菜係自家製唔知咩名堂既燒排骨, 之後主菜就係唔知咩汁整羊鞍, 休息左一陣之後就食左一杯雪糕(全晚唯一買的食物), 最後就係自製芒果布丁, 真係好好味呀!

唔洗講, 大家睇圖片啦~

洗車打腊

今日用左我2個小時做左洗車同打腊, 車箱內咩都冇做過!

其實都做左好多野架喇, 首先洗車, 因為我部車比較高, 洗車頂時都要用梯, 然後抹乾車身, 因為星期日已經用左泥膠(Clay)去除污漬, 所以今日唔洗再做, 跟住就洗車呔同車軨, 用新買果支栗米刷都幾好, 好清潔光亮, 之後就全車打腊, 我用既係水腊, 所以比膏腊上得快, 不過下次我可能都會買番膏腊, 因為水腊消耗得好快, 咁即係貴! 呢隻車腊仲有一個好處, 冇粉末, 不過我銀色車睇上左腊未真係有點辛苦! 最後再抹多一層Detailer就大功告成, 真係滑過以前打既腊好多, 仲係好明顯果種, 勁!

脫牙

今日終於都做左我呢兩年好想做既事, 就係睇牙醫! 仲係一次過做左三件事~

1. 照X光片加脫一隻蛀左既智慧齒, 多謝$60加$700
2. 洗牙, 又多謝$280
3. 補左一隻蛀牙, 再多謝$240

歷時45分鐘, 多謝一共$1,280大元, 不過都係值, 真係舒服晒!

臨走前牙醫吩咐我一年後返黎再檢查, 如果記得, 我一定會!

P.S.其實我想post果隻蛀牙既相, 不過驚太嘔心, 所以都係留比自己睇啦, 哈哈~

聰明好動積羅素

今日不得不為我家小狗作一個推介, 為左佢地要update一下個Blog
上個月帶3隻小狗同其他3個狗友去雜誌社影相, 今日通知我終於都出版了